Digwyddiadau ac Adnoddau - Un Llais Cymru
Mynd i'r cynnwys

Gwasanaeth

Digwyddiadau ac Adnoddau

Croeso i’n tudalen Digwyddiadau ac Adnoddau Argyfwng Costau Byw.

Yma gallwch archwilio uchafbwyntiau ein digwyddiadau rhanbarthol, cael mynediad at gyflwyniadau ac adnoddau ymarferol, a darganfod syniadau, cyfleoedd cyllido ac enghreifftiau o arfer da i gefnogi eich cymuned leol.

P’un a wnaethoch fynychu digwyddiad neu nad oeddech yn gallu ymuno â ni, gobeithiwn y bydd yr adnoddau hyn yn eich helpu i feithrin cysylltiadau, rhannu gwybodaeth a chryfhau eich cymuned.

Digwyddiad Rhanbarthol Sir Gaerfyrddin 2026

Adeiladu Cymunedau Cydnerth Gyda’n Gilydd

7 Hydref 2026 | Neuadd Y Tymbl, Sir Gaerfyrddin

Dyma gyfle gwych i ddod at ein gilydd, rhannu syniadau ac archwilio ffyrdd newydd o gryfhau ein cymunedau!

Ar 7 Hydref, daeth cynrychiolwyr Cynghorau Cymuned a Thref a phartner fudiadau at ei gilydd i edrych ar sut all cydweithio adeiladu cymunedau cryfach a mwy cydnerthar draws Sir Gaerfyrddin.

O lesiant lleol a chynhwysiant digidol i fioamrywiaeth a gwaith partneriaeth, amlygodd y digwyddiad y rôl bwysig y mae cynghorau a mudiadau lleol yn ei chwarae yn adeiladu cymunedau cryfach a mwy cydnerth.

Gair mawr o ddiolch i bawb a ymunodd â ni ac a gyfrannodd i’r diwrnod. Roedd eich brwdfrydedd, syniadau a pharodrwydd i rannu profiadau wedi helpu gwneud ein digwyddiad rhanbarthol cyntaf yn llwyddiant. Edrychwn ymlaen at adeiladu ar y sgyrsiau a’r cysylltiadau hynny.

Cyflwyniadau & Adnoddau’r Digwyddiad

Rydym wedi crynhoi at ei gilydd y cyflwyniadau a’r adnoddau ymarferol a rannwyd yn ystod y digwyddiad, sy’n ei gwneud yn hawdd i ail-edrych ar drafodaethau pwysig, archwilio syniadau newydd a darganfod ffyrdd o gefnogi eich cymuned leol.

Os oeddech yn bresennol neu wedi methu dod, rydym yn eich annog i gael golwg ar yr adnoddau hyn a’u rhannu gyda’ch cyd gynghorwyr a chydweithwyr.

Rhoddodd Llinos Evans, Swyddog Polisi a Phartneriaethau yng Nghyngor Sir Caerfyrddin, drosolwg o rôl Byrddau Gwasanaethau Cyhoeddus (BGCau) a phwysigrwydd deall blaenoriaethau llesiant lleol.

Tynnodd sylw at ymgynghoriadau diweddar ar draws Sir Gaerfyrddin, Ceredigion a Sir Benfro, a gasglodd farn trigolion am y materion sy’n effeithio ar eu cymunedau. Bydd y canfyddiadau’n helpu i lywio Cynlluniau Llesiant yn y dyfodol, gan ganolbwyntio ar lesiant economaidd, cymdeithasol, amgylcheddol a diwylliannol.

Roedd y sesiwn hefyd yn archwilio sut y gall Cynghorau Cymuned a Thref gyfrannu at flaenoriaethau llesiant lleol a helpu i adeiladu cymunedau cryfach a mwy gwydn.

Rhagor o Wybodaeth ac Adnoddau

Rhannodd Marissa Aris, Dirprwy Glerc y Dref, a’r Cynghorydd John Studley o Gyngor Tref Cwmaman eu dull ysbrydoledig o droi polisi bioamrywiaeth yn gamau gweithredu ystyrlon yn y gymuned.

Roedd y cyflwyniad yn archwilio sut yr arweiniodd mabwysiadu Siarter Hawliau Natur gan y Cyngor at greu Ted Teithio, menter adrodd straeon ddychmygus a gynlluniwyd i helpu plant a theuluoedd i gysylltu â natur a darganfod eu hamgylchedd lleol.

Drwy lyfrau darluniadol, pasbortau fforwyr, gweithgareddau rhyngweithiol a digwyddiadau cymunedol, mae’r prosiect yn dod â bioamrywiaeth yn fyw, gan annog trigolion i archwilio cynefinoedd lleol, dysgu am fywyd gwyllt a dod yn ‘Warchodwyr Natur’.

Roedd y sesiwn yn enghraifft wych o sut y gall Cynghorau Cymuned a Thref gyfuno creadigrwydd, ymwybyddiaeth amgylcheddol ac ymgysylltu â’r gymuned i ysbrydoli gweithredu lleol a meithrin cysylltiadau cryfach â natur.

Rhagor o Wybodaeth ac Adnoddau

Tynnodd Mike O’Hara a Kirsty Wallace o Gynhwysiant Digidol Cymru (Cwmpas) sylw at bwysigrwydd sicrhau bod gan bawb y sgiliau, yr hyder a’r mynediad sydd eu hangen i gymryd rhan mewn byd sy’n dod yn fwyfwy digidol.

Cyflwynwyd rhaglen Cynhwysiant Digidol Cymru, sy’n darparu canllawiau ymarferol, adnoddau a chymorth wedi’i deilwra i helpu sefydliadau, gan gynnwys Cynghorau Cymuned a Thref, i ymgorffori cynhwysiant digidol yn eu polisïau, eu gwasanaethau a’u harferion bob dydd.

Roedd y sesiwn hefyd yn archwilio’r Safon Ofynnol ar gyfer Bywyd Digidol (MDLS) a sut y gall cynghorau helpu i nodi anghenion lleol, lleihau rhwystrau i fynediad digidol a chefnogi trigolion i gadw mewn cysylltiad a chael mynediad at wasanaethau hanfodol.

Rhagor o Wybodaeth ac Adnoddau

Cyflwynodd Rachel Carter o Dîm Bioamrywiaeth Un Llais Cymru y Rhaglen Lleoedd Lleol ar gyfer Natur a’r cyfleoedd sydd ar gael i Gynghorau Cymuned a Thref gefnogi bioamrywiaeth a chreu mannau cymunedol gwyrddach a mwy croesawgar.

Tynnodd y sesiwn sylw at sut y gall cynghorau gymryd rhan mewn prosiectau ymarferol i wella mannau gwyrdd lleol, annog bywyd gwyllt a gwella’r amgylchedd naturiol i drigolion.

Rhannodd Rachel hefyd wybodaeth am y cymorth a’r adnoddau sydd ar gael i helpu cynghorau i weithredu a gwneud gwahaniaeth cadarnhaol i fioamrywiaeth yn eu cymunedau.

Rhagor o Wybodaeth ac Adnoddau

Uchafbwyntiau o’r dydd

Buom yn edrych ar Gynllun Llesiant Sir Gaerfyrddin, y ffordd y datblygodd Cyngor Tref Cwmaman eu prosiect ymgysylltu cymunedol ar fioamrywiaeth, cynhwysiant digidol gyda Cwmpas a Lleoedd Lleol ar gyfer Natur Un Llais Cymru.

Helpodd trafodaethau rhyngweithiol i adnabod asedau lleol a chyfleoedd newydd ar gyfer gwaith partneriaeth.


Adborth ar y Digwyddiad

Yn seiliedig ar 21 ffurflen werthuso

Dywedodd 81%

fod y digwyddiad yn rhagorol

neu’n dda iawn

Dywedodd 71%

fod y rhwydweithio a’r rhannu yn

ddefnyddiol iawn

Roedd 76%

eisiau mwy o rannu

arfer da

Yn Eich Geiriau Eich Hun…

Dyma rai o’r pethau yr oedd pobl gymerodd ran yn ei hoffi fwyaf am y dydd:

“Roedd yn wych cael cyfle i sgwrsio gyda chynghorwyr eraill. Fe rannon ni arferion da.”

”Rhwydweithio – cysylltiadau newydd.”

”Cyfathrebu gyda phobl eraill o gefndir gweithio tebyg.”

”Clywed beth mae mudiadau a chynghorau gwahanol yn wneud.”

– Pobl a Gymerodd Ran yn y Digwyddiad

Cymorth Ariannol i’ch Cyngor

Cyfleoedd Ariannol Ychwanegol yn Sir Gaerfyrddin

Chwilio am arian i gefnogi prosiect yn eich cymuned?

Mae gwe-dudalen Cyllid Cymunedol Cyngor Sir Caerfyrddin yn cynnwys gwybodaeth am grantiau a chyfleoedd ariannol allai fod ar gael i gefnogi mentrau lleol. Porwch drwy’r dudalen i ddod i wybod mwy am ffynonellau ariannol posib, a ydych yn gymwys a sut i wneud cais.

Cynllun Grantiau Bychain Costau Byw

Mae ein Cynllun Grantiau Bychain ar agor o hyd, ac mae’n cynnig £500 i Gynghorau Cymuned a Thref cymwys a chanddynt incwm blynyddol o £75,000 neu lai os nad ydynt wedi cyflawni prosiect Argyfwng Costau Byw yn barod.

Mae grantiau ar gael trwy’r cyntaf i’r felin gaiff falu. Holwch fwy a gwnewch gais.

Lleoedd Lleol ar gyfer Natur

Dysgwch fwy am gyfleoedd i gefnogi biodamrywiaeth a thir glas cymunedol. Darllenwch fwy.


Cylchlythyr Grantiau a Chyfleoedd Cyllido

Peidiwch ag anghofio am ein Cylchlythyr Grantiau a Chyfleoedd Cyllido rheolaidd, sy’n dwyn ynghyd gyfleoedd cyllido cyfredol, grantiau ac adnoddau defnyddiol ar gyfer Cynghorau Cymuned a Thref.

Gallwch ddod o hyd i gopïau o’n holl gylchlythyrau cyllido yma.

Parhau â’r sgwrs

Bydd eich syniadau, profiadau ac adborth yn helpu cyfrannu at ddigwyddiadau rhanbarthol eraill ar draws Cymru.

Y Fforwm Argyfwng Costau Byw

Gofod cydweithredol i Gynghorau Cymuned a Thref rannu arfer gorau, gofyn cwestiynau, a chael help a chyngor ar faterion sy’n effeithio ar eich cymunedau yn sgil yr argyfwng Costau Byw.

Diolch am bopeth rydych chi’n ei wneud i gefnogi eich cymunedau.

Y Tîm Argyfwng Costau Byw